ఒక కెనడియన్ ఆదివాసీ రచయిత్రి చెప్పిన మూడు కథలు

నేను ప్రస్తుతం Lee Maracle అన్న కెనడియన్ ఆదివాసీ రచయిత్రి రాసిన My Conversations with Canadians అన్న పుస్తకం చదువుతున్నాను. పుస్తకం సగంలోనే ఉన్నాను. ప్రస్తుతానికి నా అభిప్రాయం: ఎవరో వచ్చి రోజుకో లెక్చరిచ్చి లెక్చరుకో మొట్టికాయ, ఓ లెంపకాయ, పెడేల్మని ఓ చెంపదెబ్బ, ఇలా మార్చి మార్చి అంటిస్తున్నట్లు ఉంది. ఇలాంటిదొకటి మన ఆదివాసీ వాళ్ళెవరో కూడా రాసి దాన్ని భద్రలోక్ మే బాంబ్ షెల్ లాగా మన మధ్య వదలాలని నా ఆకాంక్ష. (ఇలా అన్నానని ట్రోల్ చేసేరు – చేయకండి).

ఈ పుస్తకంలో రచయిత్రి చెప్పిన రెండు మూడు నిజజీవితంలో జరిగిన కథలు నన్ను ఆకట్టుకున్నాయి. వాటిని ఈ పోస్టులో పంచుకుంటూన్నా. అన్నట్లు ఈ కథలకి ఈ తెలుగు టైటిల్స్ నా సృష్టే.

మొదటిది: తిమింగల సంగీతం

ఒకసారి ఆర్కటిక్ మహాసముద్రం ఉత్తర భాగంలో కొన్ని తిమింగలాలు మంచు గడ్డల మధ్య ఇరుక్కుపోయాయంట. సరే, శాస్త్రవేత్తలు అమెరికా, రష్యాల నుండి ఇట్లాంటి భారీ మంచుగడ్డలని పగలగొట్టే యంత్రాలకోసం అడిగారంట. కానీ అవి ఇక్కడికి చేరడానికి వారాలు, నెలలూ పట్టొచ్చు. ఇంతలోపు ఈ తిమింగలాలు బతకవేమో అని వాళ్ళ చింత. ఇది తెల్సి, ఆ ప్రాంతంలో ఉండే ఇనుయిట్ జాతి వారు మా సంప్రదాయ పద్ధతిలో తిమింగలాలతో సంభాషించగల సంగీతం ఉంది. మేము ప్రయత్నిస్తాం అన్నారంట. ఈ ఆలోచన కొంచెం విపరీతంగా అనిపించి మొదట శాస్త్రవేత్తలు ఒప్పుకోలేదు. అయితే, ఇంతలోపు ఓ తిమింగలం మరణించడంతో ఇక వీళ్ళని ప్రయత్నించనిద్దాం‌ అనుకున్నారు. ఇనుయిట్ వారు వాళ్ళ లెక్కల ప్రకారం మంచుగడ్డలకి అక్కడక్కడా రంధ్రాలు చేస్తూ వాళ్ళ సంగీతం గానం చేస్తే తిమింగలాలు వాళ్ళ గాత్రాన్ని అనుసరించి నెమ్మదిగా అలా అలా బైటకి వచ్చేశాయంట!! అసలలా ఎందుకు జరిగిందో ఎవరికీ తెలీదు కానీ ఇది వాళ్ళలో ఎప్పట్నుంచో ఉన్న పద్ధతేనట.

(ఈ సంఘటన ఏదో నాకు తెలియదు కానీ, ఇలా జంతువులతో సంభాషించే సంప్రదాయం గురించి ఒక వ్యాసం ఇక్కడ చదవొచ్చు).

రెండవది: ఫెమినిజం పుట్టిల్లు

Elizabeth Cady Stanton అన్నావిడ తొలితరం మహిళా హక్కుల ఉద్యమకారిణి. పందొమ్మిదో శతాబ్దపు అమెరికాలో ఈ విషయమై ఎంతో కృషి చేసింది. ఈవిడకి సెనెకా అన్న అమెరికన్ ఆదివాసీ తెగకి చెందిన స్నేహితురాలు ఉండేదంట. ఒకరోజు ఆ స్నేహితురాలు ఎవరో తెల్లాయన భూమి అమ్మకానికి పెడితే కొంటున్నా అని చెప్పిందంట. ఎలిజబెత్ ఆమెని “మీ ఆయన ఏమన్నాడు కొంటా అంటే?” అని అడిగితే ఆమె “ఏం అనలేదు. కొనేది నేను కదా” అన్నదట. ఆకాలంలో మహిళలు తమపాటికి తాము భూమి కొనడానికి అనర్హులు. ఎలిజబెత్ అదే అంటే ఆ స్నేహితురాలు – “అది తెల్లవాళ్ళ రాజ్యంలో రూలు. మాకు అలాంటివి లేవు” అన్నదట. అక్కడ నుంచే ఎలిజబెత్ ఆలోచనల్లోకి ఫెమినిజం, మహిళలలి ఓటు హక్కు వంటి భావనలు ప్రవేశించాయంట. (ఫెమినిజం అన్నది ఆదివాసీలకి ముందునుంచే ఉందని చెప్పడానికి ఈ కథ చెప్పింది రచయిత్రి).

(ఈ విషయం గురించి ఒక ఆసక్తికరమైన వ్యాసం ఫెమినిస్టు.కాం అన్న వెబ్సైటులో ఇక్కడ చదవొచ్చు)

మూడవది: ఎలుకతో పెట్టుకోకు

1993 లో నవాజో తెగ వారు నివసించే ప్రాంతంలో హంటావైరస్ వ్యాపించిందంట. శాస్త్రవేత్తలు ఇది ఎక్కడ్నుంచి వచ్చింది? అన్నది తెలుసుకోడానికి ఇంకా ప్రయత్నిస్తూ ఉన్నారు. ఒక నవాజో యువకుడు వాళ్ళ తెగలోని ఓ పెద్దావిడని అడిగాడంట దీని గురించి. ఆమె వాళ్ళ కథల్లోంచి ఓ కథ చెప్పిందట – సారాంశం ఏమిటంటే మనిషీ, ఎలుకా ఒక ఇంట్లో ఉండకూడదు అని. శాస్త్రవేత్తలు చివరకి కనుక్కునది ఏమిటంటే ఆ వ్యాధి ఎలుకల ద్వారానే వీళ్ళ మధ్య వ్యాపించిందని.

(ఈ ఉదంతం గురించిన వికీ పేజీ ఇక్కడ)

ఇంకా ఇట్లాంటివి కొన్ని ఉన్నాయి … పాయింటేమిటంటే ఎక్కడైనా అక్కడి ఆదివాసీల నోట్లోంచి వాళ్ళ కథలు వినాలని… నవ నాగరికులు అనుకునేంత తెలివితక్కువ వాళ్ళెవరూ లేరిక్కడ.. అని రచయిత్రి అభిప్రాయం.

ఇట్లాంటి పుస్తకం మాత్రం మనకూ ఒకటి ఒరిజినల్ ది పడాలి. పడి కొన్ని తలలు అయినా పగలగొట్టాలి అని కావాలంటే నేను సైతం ఓ వెర్రి గొంతుక విచ్చి మ్రోస్తాను.

Published in: on July 24, 2021 at 5:25 am  Leave a Comment  

The URI to TrackBack this entry is: https://vbsowmya.wordpress.com/2021/07/24/leemaracle-book-excerpt/trackback/

RSS feed for comments on this post.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: